HOOYADU WAA LAMA HURAAN - By: Carays Ciise Kaarshe |
Maansadan saarka ah waxaa hal-abuuray (AUN) Carays Ciise Kaarshe, Hooyada oo haysata darajada ugu sarraysa ee xuquuqda ee dhan walba ah wixii ilaahay ka soo hara, marka laga reebo tan suubbanaha oo dhanka diinta u gaar ah, soomaalidu way tumatay xuquuqdaas abaalkeediina way heshay, wuxuu yiri abwaanku: Ha' looxaa lagu dhigaa, higgaad waa la akhriyaa hagaag waa loo socdaa, hor waa loo sii hoydaa hadal waa la hindisaa. Ha'dii kale waxaan lahaa Muddaan uurka hurrudnoo, culays bey hayn jidhoo talaabtey la hakatoo, xanuun bey la hingatae hooyadu waa lama huraan. Ha'dii kale waxan lahaa Habeen goor uu bartamay, caanihii bey nagu habtoo horaadkey noo dhigtoo, dharkii bey na huwisaye hooyadu waa lama huraan Calooshaadoon hif oran, adiga oon ka haqab bi'in hunguri ma haweeysatee, hooyadu waa lama huraan Hadaaq goor aad tahayo, tallaab adan holi kareyn adoo ciiddii hambaday, dhaqsaba waa ku hinjisaye hooyadu waa lama huraan Afkaa aan ku hadalniyo, hannaankeeniyo hub-qaad hagaag bey noo bartaye, hooyadu waa lama huraan Innaga oon haybad qabin, hal beesa aan suubsan karin habaaskeey naga huftoo, waa tii noo hiillisaye hooyadu waa lama huraan Si aannaan halis u gelin, hungurigay suubisaa dhaqsaba hoo nama dhahdee, intii ey ka hubsataa iyada yaa ku hormartee, hooyadu waa lama huraan Reerku hadduu yahay hayaan, hayinka aan saarannahay hoggaankey haysatoo, hoos bey kaala hadashoo intii aad ka huruddaa, waa kuu heestaa haddane hooyadu waa lama huraan Cilmiga shiikh ku-hormariyo, nin haamaan ah iyo hanad iyadaa soo hayn jidhaye, hooyadu waa lama huraan Haddii loo baahdo hiil, geesiga loo habar wacdiyo fuleyga aan haadka hubin, iyada soo hayn jidhaye hooyadu waa lama huraan Deeqsi aad soo haybsatoo, hamuuntii kaa ba'shiyo bakhaylka aan kula hadleyn, iyadaa soo hayn jidhaye hooyadu waa lama huraan Aabbuhu waa hawsha guud, iyana hoos bey haysaa habayntii guriga iyo, hoygii bay noo huftaye hooyadu waa lama huraan Geed yara kaa hooshay meel, haddii aad haah dhahdaa hubkii bey ka handaddoo, iyada oon hagar lahayn haw waa tii soo dhahdee, hooyadu waa lama huraan Odagu waa haajiraa, hawuu meel ugu kacaa hadduusan mawtku helin, hortaadey taagantee hooyadu waa lama huraan Habeenkaad soo dhaxdaa, hurdada aad uma heshoo qalbiga waa ka hammidoo, hilow bey kuu qabtaye hooyadu waa lama huraan Horey adigoon ahayn, dadkii bey u hanjabtoo halyeey beey kaa dhigtoo, ammaan bey ku huwisaye hooyadu waa lama huraan Abaarta hawaarsatiyo, harraad meel loogu go'ay heyhaata uu dhaanku yahay, cirkuna haawanahayaa halihi ey soo heshaa, haddey hoo ina dhahdaa innaga oon soo hambeyn, waatii aan heensannoo hamuunteedii horiyo, dhib bay la hagoogateye hooyadu waa lama huraan Sidii awr haamman wada, dusheedaan halabsannoo hah goortaa nama dhahdee, waa noo sii hoorsataye hooyadu waa lama huraan Marada ay nagu hantiday, haddaan hoos uga dhacnaa wadnihi bey ka hinqatoo, calooshey ka halcataye hooyadu waa lama huraan Alaabta horteeda taal, haddaad laad ku hurguftaa habaar weyn kuma dhahdee, inyar bey ka hifataye hooyadu waa lama huraan Hilowlaha ay dhashaa, haddii meel laga hayaa asuu haaraa habeen, waa tii hoogaysatoo ilmadu ay hibitiqdee, hooyadu waa lama huraan Haddaan been lagu hadleyn, wadnaha hawdiisa iyo halbowlaha dhiigga wada, hareer baa laga dhigoo halkey joogaan iyagu, yaa loo soo wada hoydaye hooyadu waa lama huraan Hantida aad leedihiyo, wixii aad haabataa haddii loo siiyo hibo, abaalkood lama helee hooyadu waa lama huraan Heddaadu haddey gashaa, hog goortii lagu dhigoo wadaadduhu kula hadlaan, aabbaha looma hal wacee Waxaad tahay inna-heblee, hooyadu waa lama huraan Adduunyadu waa haween, halkaa laskuma hayee nin doonaba ha hadlee, hooyadu waa lama huraan Hirar gaagaaban iyo, hawada yaan ka hadlayaa waxba anigoon hambeyn, hubaashiina aan hayaa hooyadu waa lama huraan Hanfada ruuxii noqdaa, hawraar kaama hantiyee waxba anigoon hambeyn, hubaashiina an hayaa hoyadu waa lama huraan. Maxamed Cabdi. aamaguul@hotmail.co.uk |
© All Rights Reserved aamaguul.com | Contact: webmaster@aamaguul.com | Designed by Mhmd aamaguul.