|
Toddobaatan midabley Dadka muuqa guud iyo, Magac kala sinnaadaay Marwo dumar Garays iyo, Marya kala sinnaadaay doqontana masayrkiyo, Munkar kala sinnaadaay Miidaamo dhega laay, Badda mawjadeedaay kolba maayad keenaay, ruuxaan malaynayn dhiigiisa miirtaay, Masaartii afweynay Mindi lagu qaraabtaay, Marti uma shireeyaay Magan kuma hagoogtaay, Mahadhooyin reebaay Maahmaahda yaabkaay. Maandeeq irmaan oo, Maraqeeda xoortoo Nacabkeedu maaloon, Maqasheeda korineey Mayey iyo hillaaceey, Miiraale Roobaan Majaroor biyeyneey. Maydali fardoodeey, Ashkiraan murgucanneey Madow iyo casaaneey, Maarriin dhallaalaay Magarkii la sheegaay, Toddobaatan midabey Geed aan Magool iyo, Miro iyo caleen iyo Ubax iyo man dhalinoo, aan mayrax laynoo lagu oodan maalkoo, Milic laga har gelinay Maartii dhalaashee, aan moodey Dahabkee Milantee caddaatee, isku miir dillaacdaay Maydyohow qoslaayee, Milgihiyo xishoodkiyo Maamuuska weydaay, Majihii ku daaloo Madaxaad ku socotaa, Meelaad ku nooshiyo Muslinka iyo Gaalada, Midka aad la dhaqantahay Mooyaan adduunkoo, Ma huraanka aakhiro Marax kuuma yaalloo, Maantay xisaabtiyo Miisaanka joogtee, Naftu kugu muddici tahay Maanlay afkaagaa, Kugu marag furaayee sawtaad i mudatee, igu muusannawdaan Fartan malabka kuu daray, Sawtaad melmelateed, Murdisada ka leefteed Mahad iigu celiseed, igu tidhi macaannaa Ma filayn abaal laay, Maxrashoon kaliileed ama maangad iyo Hawd, Waxa kuu maleegtee Danahaaga maamulay, Muran inaad ka keentoo Midigeys u bayrtood, Moqoraysi baratee Mugdigaan u heesaay, Gudcurkaan majeertaay Maansooyinkaygiyo, Murtidayda lumiyaay Madadaalo beeneey, Maaweeladaaddii Meexaanahaagii, iyo muhashadaydii Maankaan ka saaroo, Kaa mayray laabtoo Masallihi jacaylkiyo, kuu dhigay maqaarkaad Maydhaamanaysoo, Nafta kaa muquunshee Ruuxii merganayaa, Miyir qaata soortee laba midig ku daaqaay, Kolley miigan mayside Caawa yaad miraysaa, Tolow yaad ku maqan tahay Cidhibtee ku mudan tahay, Miciyaha ku haysaan. |
|
|