|
Haatuf Cilmi sow hoggiisii, hindisuhu imuu geyn hambalyiyo salaan iyo, how hees umaan tirin Halka uu ku noo yahay, hanti wuxu guddoontee hor Illaahay ugu tegey, hubi sow is maan odhan hodan sow ma weydiin Sow waa nin hoydoo, ifka taar la haystee kama helin jawaabtii Xalay fiid horaadkii, sow haatufkiisii hud-hudkii u soo diray, gacan haadiskiisii kama halacsan sheedoo, horin bayla socotee kama hadhin barbaartii Sow maan hor-gelinoo, hayhaato maan geyn dabadeedna haybtii, haye kow ma aan odhan wuxu yidhi halyeygii, ama haadda soo faray ku billaabay heestii:- Ninka ila hadlaayee, ii soo hiloobee hawdkiyo xabaalaha, hiilkaygu keenee hambalyada isiiyee, hogga iiga yeedhow hab-dhaceeda maansada, adigaa higgaadshee anigana war iga hoo" "Waxay howli joogtaa, ama lagu harraadaa hanad lagu cidhiidhyaa, hanti lagu gumeystaa dumar hoodo leeyahay, raga hoos u eegaan hoogtada adduunyee" "Qofka samir hanbaystaa, godka kuma hungoobee ifka hadimmadiisiyo, dhibtu way horreysoo ma huraanta aakhiro, anigaa ku haystoo hogol bay kor joogtoo, onkod iyo hillaac baa dusha iga hadheeyoo, haro aan go'ayn baan darayaa hadhuubkoo, hoobaan bislaataan habaq li'i dhex joogaa, ishu halacsanaysaa guri hoos qabow bay, halabtaydu taallaa," "Nafta waxaan u habaya, sida hooyo wiilkeed naasaha horaadkiyo, haaneedka siisiyo nirig hooto nuugoo" "Hodan iyo jacaylkeed, dani igama haysoo hablo Xuural caynaan, haasaawiyaayoo huwanahay taftoodoo, lagu yidhi u heesoo geelii hor weyn baa, igu soo hormanayoon u hayaa wadaantoo, hawl bay sugaysee haye nabad walaalow |
|
|