|
Dhahar Dhamme Maxamed Xaashow, ina Xaashi Dhamacow Dhaadmada dareenkiyo, Dhacdada iyo waayaha Ninka ila dhadhamiyow, Jiilaalku dheeraa Dhulka xaabki ka idlaa, Dhalma deys cirkii noqoy Dabka dherigii saarraa, Dhagxantii bislayn waa inkastoo dhir xoogliyo, Dhamac yaab leh lagu shiday ma dhadhaab nuglaadoo, sida dhaylo suulkiyo lagu goosto dhooshoo, Hilib laga dhishaa jira? Dhamme Maxamed Xaashow, Ina Xaashi Dhamacow Dhahar waa ninkiisii, Garashadu dhibtiisiyo Dhaawaciisa weeyaan, Dhalanteedka beentiyo Dhaymihiisu waa Faan, Shilka dhacay ma moogee isagiyo dhanqalantada, Dhacantaa u kala rogan Wuxu yidhi "dhibaa jira, Dadku baahi dhigatoo Lafahooda dhuuxdiyo, Dhugatay la jiifaan Arrin aan dhegeystoo, i dhacaysa maahee waxa aad dhafoorkiyo, Dhabannada la haysaan Maqashay ka dhegalee, hadday tahay dhismaha guud ka dardaarmay dhawr jeer, Hadal kuma dhabcaalayn Dharaartiyo habeenkii, Dhawaaqaygu ma hakado waxa weliba ii dheer, Dhanbaalkiyo wareegtadu weligood is may dhimin Annaa guusha dhaliyee, Dadka wada dhergaan iri waxa hara dhigtaan idhi, Dhux-dhux iyo faq hoosiyo Dhagar qabe ha joogee, weli ruux dhammays oo i dhalliila maan arag Dhugashada kormeerkiyo, Dhaabaddiyo fagaaraha Dadku sacab is dhaafiyo, Dhag-dhag iyo mashxarad bay igu soo dhoweeyaan, Dhan kastaba magaalada inta ay Sar dheer iyo, Dhabbo iyo jid leedahay waxa dheeh farshaxan iyo, Sawir wada dhalaaliyo waxa iigu dhigan Faan, Dhaayihiinu ha arkaan Dhug u yeesha maansada, Dhubbad-qaadka heesaha Abwaan dhaartay suu yidhi, Miyaad ruux i dhaamoo lay dhaafsho haysaan? Dhallinyariyo waayeel, Dhabba aan u hadalnee Haddaan dhigo xilkaan sido, Yaad u dhiibanaysaan? Dhamme Maxamed Xaashow, Ina Xaashi Dhamacow Kolley buuxsan dhiilkii, Toban saniyo dheeraad Lagu dhurayey ciilkoo, Lugtu jeeni dhaaftee Dhaadashada ma sugan tahay, Dhumuc iyo ma xoog baa? Dhillowyahankan geedkii, Lagu beeray dhiiggiyo Dheecaanka waratada, Dhexda tolow iskaga maray Dhirta maw abtiriyaa, Sida dhalashadeediyo Dhaqankeedu kala yahay?, Mise wuxu ka dhiganyahay Habartii mar dhooftee, Doonnidu la dhacantee Badda dheelligeediyo, Dhaxantiyo dabaylaha Dhawawalan ka qaaddee, iyadooy dhaqaaliyo Nafba kala dhaqaaqeen, kadib dhawr ayaamood Salka dhigatay ciiddee, Dhulow kaama kaco tiri. Dhamme Maxamed Xaashow, Ina Xaashi Dhamacow Cashaday dhaharatee, Geelu dhimo haruubkee Dhaqayiyo galoof yahay, Rag ka dhoofa baa jira Dhamac yo hannaan iyo, Saddex dhaqan wadaagtoo isu dheelli tirantaa, Dhuuni lagu bislaystaa Gaarriyow dhardhaarrada, Kol haddii mid laga dhigo Rag dhuyaala baa jira Maalintay dhanaan tahay, Rag dhirbaaxo guureed inta ay ku dhaashtaan, Xiddigaha is-dhalan roga u dhufaanan baa jira Inta qaran dhiskiisiyo, Dhidibkiisu taagnaa Dheeraad nin dooniyo, Nin ku dhega xaaqiisoo Dhacsanaayey baa jirey Dhederbiga colaaddiyo, Rag hadduu dhabiiltamo ------- Fule dhimashadiisaa, Dhawr jeer noqnoqotee wax la yiri dharaartaas, Ninkii dhiirran geeridu isagay la dhalatee, Hasha dhaxal wareegtiyo Dheeha furashadeedana, keligeen dhunkaashiyo Dhugtan kama go'aynee, Haddii laysu jilib dhigo Kumanyaal dhigeenoo, waxba dhawrsanaynoo sida awrka dhaameel, Dhoomuhu gubeenoo Dhibta kula wadaagoo, isu dhaarsan baa jira Dhamme Maxamed Xaashow, ina Xaashi Dhamacow Dhidarkuba xabaalaha, kuma dhaadhaceenoo kuma dhiirradeen ruux, Celin kara dhawaaqee kolkuu meydka dhiilliyo, Dhaqdhaqaaq ka waayuu Hore ugu dhowaadaa, Dhinacyadiyo feeraha Muruqyada ka dheegtaa Kol hadduu dhawaaqii, Dhicisoobey gabaydii Dheg ka maqal ha joogee, Lumay dhaqan galkiisii Sheekadu Dheg-Dheer iyo, Dhoor-doolis noqotee Gaarriyow dhammaadkiyo, Dhakhso mawgu gudubnaa Bulbullahan dhabbacashada, Ku marsaday dhallaankii Lafta dhabarka ka habsadey, Waayuhu dhirbaaxeen Dhaadhaada taahiyo, Dhuun-yeedhis mooyee Sida kale u tamar dhigay, Beri buu dhinbiil iyo Dhuxul daba ka kululaa, Weli lagaga dhawrsado Xaajadu ha dhabaqdee, Dhabba maw abbaarnaa Dadka dhiillo culus iyo, Dhakafaar ma gelinaa Wedka maw dhadhaminaa, Dhagar maw bareernaa? |
|
|