|
Daryeel Markaan daafta hoosiyo, arko daymo-bogashada ararha la daadshiyo, dhirta lagu daleeyiyo waxa buuro daah wayn, lagu daabay ciidiyo bado laba dibleeyaa, ishu damac i gelisaa. Markaan daawashada guud, dayixiyo cadceediyo dildilaanka fadadkiyo, onkodkiyo dayaankiyo danab laba dhacaayiyo, dardaraa hilaaciyo arko hogol darroortaa, runtu igu duxdaayoo derejada Ilaahay, dib usoo xasuustaa. Haddaan doogga cawskiyo, deegaantu saarayn dhulku duug ma yeesheen, dihaal mareebeen qofna kuma daneysteen, Rabbiyow dushiisoo dunidaada eebow, adigoon cid dirranbaad todobaad ku dadabtoo, iyaddoo dambarisoo sida doonan gabadheed, inta timaha loo dabey dunta lugu afmeershaa, laga furey daboolkoo dalagkaad ku beertaa, ninba weel darsanayaa. Inkastuu qof diintiyo, dar ilaahey jecel yahey labadaan af yeeshaa, koley waa dambaabaa hadduu kaa abaal daro, dadka kaad u roon-tahey adigaa dul qaatee, Rabbiyow hanugu dumin cirka duudka weynoo, Rabbiyow aannu nala degin dhulkan aanu daaqnaa, Rabbiyow hannugu didin bahalaha derderanoo, Rabbiyow hanugu dirin dabeylaha cartamayoo, Rabbiyow hanugu dirin duufanadaadoo, Rabbiyow hanugu darrin durdurada rogmanayoo, Daad xoor hanaga dhigin. Rabbow duunyo nool baan, ka awoow dugsanayoo dibnaheygu caaniyo, dux baruurleh mooyee uma baran wax doorshee, Rabiyoow diraaciyo jiilaal dab-kululoo, dibad joogta cowshiyo dabar gooya xoolaha, Dibirtooda naga hay Raboow roobka deyrtiyo, guga doogsintiisiyo Dirirada xareedaa, dacalada hanaga marinee. Rabbow duumadaadiyo, inta cuduro duushee Docwareenka feedhaha, sambadada dalooshiyo Dacuun hanugu ridin. Rabbiyow dagaaliyo, dabley gaatamaysiyo doofaarro badan baa, musduleedka joogee kuwa diidey nabadiyo, belo laga ducaystiyo manaxaan hanoo dagin, duulaan hanagu jebin. Rabbow dowladnimaduna, kuma iman dalxiisoo doorroonayaal baa, u daldaley naftoodoo dumar baa hugoodiyo, dahabkii u iibshoo Doondoonisteedii, dhiig baa ku daatee, Rabbow dawlad curatoo, ubadkeeda deeqdoo dakhrada bogsiisiyo, dawa la isku baantiyo ka dhig malabka doocaan. Rabbiyow dirkeygii, gobolaa dambeeyoo u dib jirey caddaawoo, darrayada gumeystuhu daran-doori lagu dayey, rabbiyow ka soo daa Dibin-daabyadoodoo, shanta dagal isu keen. Rabiyo dadkaygana, danwadaag isjeceloo darjaysa qarankiyo, bulsho laga dabqaatoo Carro Edeg ku dayatiyo, ka dhig ul iyo diirkeed. Rabbiyow dugaalkiyo, dugsi waa dhul hooyee dibad ruux u sahan tegey, duli waayi maayee!! nin da'diisa tuugoo, dawarsadey asaagii doqoniimo weeyee!, dalkayaga Ilaahow dheregiyo daryeel iyo, Wax nadeeqa nagu sii. Rabbow doodda akhiro, marka ay durbaankiyo dawanadu is dhaafaan, dadku kuu yimaadaan deryka soo fadhiistaan, rabbiyow hanagu darin inta aad ku digatee, u dareerta Naartoo labadaada daraarood, rabbiyow ta door roon Kuwa dagaya naga yeel, Amiin Allahayow Amiin Allahayow!!! |
|
|