|
Daahyaley Daalacan warkeedii, iyo faraskii Doolaal dalan-doolka maansada, dar-dartiyo wacdarihii sida danab u laba dhacay, dadku maqalyey shaalle. Dedda kaca rogaalkiyo, daahyaley carcaraheed maantana dinaahyaha, dayax weerar baa sida Gaarriyow ku soo durug, malmalkiyo dab-qaadkii iyo weliba deebaaq, dabray oo haddana furay misna daah kalaan rogey Deelley wankeed qalan, daaheedu waa furan hibashada dareen kacay, degmadeenna beer-qaad sida daadka maanshee, Hal-abuurku duunkiyo dhul damqaday ka faalloo, ninba garashadiis direy darka cagaha soo geli, sii durugtay sheekadu dumarkiina soo biir Rag darmaano soo fuul, ragna dalawadiisii iyo doobigii keen, ragna dayrcadkiisoo baarqab doobyayaa wado, bandhiggii ku soo daa Nin dameero soo horay, yaan la odhan denbuu galay billay duunyadiis tahay, waxse iga dardaarana ninka daaqsanaayow, dafaclaha gosheediyo dixda hayska joogtee, yey nagu dannaaniyin ama geela naga didin Nirgo daaddah baradaa, derrimaha mareerka leh sida digirin jiifee, yaanay naga danbaabirin Doqon yahay masayrkiyo, danni lagu abuuree deeqdii Illaahay, deelqaaf ka mudataay adigiyo dangaladaa, Da' kastaydin qooqdaan waxa aydin dihataan, daratiyo ma Caal baa? Maansada dunteediyo, waxa lagu dir soocdaa degelkiyo dhirteedee, heellada ma danadiyo dibowgaa ka gurataan? Murtidiinnu dakhariyo, dalab iyo lalleemiyo daldaloolo badanaa? Ma dareere miirtiyo, Duddun bahal galeenaa? Dardartii aftahankiyo, dilladii farshaxankiyo dux abwaan ma sidatoo, diiftii saboolkiyo daal baa ka muuqdee, gabaygaba ma docashiyo dawersaad ku keentaan? Mise dagan ma dhaaftiyo, duul baad ka gadataan dhul dellegan ka soo xada? Mise luuq dahsoon iyo, suuqa doqon ma garatiyo ku-dhacdaad ka dayataan? Marka geel dar loo horo, Diin maxawgu heestaan? Haddii reerku lama dega, meel daaq ka dheeryahay Degel oomman furan yahay, dadka guriga joogiyo waxay duunyo haystaan, diihaalka wada qabo daruurana ka hooraan, meel durugsan goortaas maxaad daanka oo qudha, ula doogsin carartaan? Gudin-yahay dulbaaxdiyo, dufan lagu afeeyee dareenkeedu laaciyo, milicsiga ku deexdee danbarsiga cadceeddiyo, dabayoodka luunka leh weligeed ku darartaa maxaad doodad beeshiyo, danta qaranku leeyahay dusduskaaga foofkiyo, damac uga hor marisaa? Noloshaba ma dirashiyo, damqashada calooshiyo dalqadaad ka barateen? Midha-Daray raggiinnaa, duuduub ku liqayow kolley geedka duuggiyo, taariikh la daastiyo laga diirto magac hara sida diirta xagatoo, dadnimada arradisee dib maxaad u dhigateen, duniduba ma maantaa? Dab cunaannu idin nidhi. Maansadu dan guud iyo, dalka hanashadiisiyo dadka wada-jirkiisiyo, dawna way ku socotaa dawladnimaw samafala in kastoo dirkeediyo, dulucdeedu saas tahay misna loo dardaar weri, ka hor yimi nin diiddani Deri iyo u yeel tuur, dunjigeeda maydhaan xistigeedu daba gure Dabinnada shirqoolkaa, inta boholo loo dedey kaga gudubtey daanshood, digashadu ma saamayn dhibta waw dul leedahay, dibin daabyo hoosiyo dabra-weerar caabbiya, duullaanna waw haray . Dibso aan nidhaahnoo, ha dekaanto mooyee dabarkeeda geenyada, geedkee ka diirraa qorshahaba laguma darin. Doc wareenka sheelkaa, iyo saymo dawdilan kuma dagato maansadu, xinka way ku darartaa kulka way u dirantaa, dabka way ku carataa haddii jeedal lagu dayo, deeddankay ku badisaa Dakharrada la yeeliyo, hubka lagula daalee ha ku ddbecdo lagu wado, dardar bay ka qaadaa Haddii dayro laga dhigo, derejaabay tolataa Calan bay deldelataa daddii sayga laga dilo, doqon geesigeedii ninka daray billaawaha, i-dumaal tiraahdoo dakanada illowdoo, dhanka kale u durugtoo diga-rogata maahee, timahaabay dabataa Dunta waxay ku xidhataa, wiil dardaarankeed qaba magaciis Dulmane yahay, Duqa dhalay sabool yahay Danyar hooyadiis tahay, inta xeerka dumisyo Deni waa ka garanuug Dacwaddayda Ciinow, dire-dire umaan tirin Deel-qaaf ka xeel dheer, uma jeeddo daw-dhaaf daandaansi kama wado, ka Da'weyni ruuxaas derejiyo xil-qaadkeed, nin u dudaya maan ihi damac wayga xaaraan, dilla-gabay ku faankiyo Doqonniimo hadalkiyo, i dayaay wax kuma falo maba lihi dareenkaas Waxa qalinka igu diray, dadku way tirsanayaa deynna waa ka maqan yahay, dana jirena waan ahay danyartiyo saboolkiyo, anigiyo doc-warantuna isku digato maahine, daawaannu leennahay diilalyada cuslaysiyo, daalaa-dhacoodaan aniguna damqanayaa, xaq haddaan ku daakiro ma deyrkii Maakaan gubay? Danbarkiyo karuurkiyo, caanaha durduurtaa dadku haw sinnaadeen, haddii laygu dilo taas taariikhdu duuggeed, Dirirrada sidkood go'ay Door-roone haw hadho, dibna mooyi saw noqon Dal Allee Dharkaynow, haddaad maanta dagantahay ninka duunyo kaa wada, afka kama daboosheen maxaad deelka maansada, dacar iyo dhunkaal iyo Duumo uga arkaysaa? Maxaad uga didaysaa, uga dhigi wax kuu daran armay doorba kuu tahay. Haddaan waawey Roob da'ay, dayra-dhaafka jiilaal guri laga dugaashado, aqal laba deryaalaa Dadabtiisu nooshahay, celin kara darooraha docihiyo raartiyo, dhan kastaba ka dalab tiran Ummadduna dugsoonkaas, dermo qaran ku jiifaan bulshadoo dar hoogiyo, taalla dooxa geerida hadduu daad u soo galo, miyaan waayey deelkiyo dareensiinta dhiillada ? Duunyo waa la foofshaa, daaqna waa la geeyaa Doorna waa ilaashaa, isha daymadeediyo digta luuqdu woow wehel Duhurkaa la ururshaa, tiro lagu dabbaalaa dabadeed la hooyaa, kol hadday dareeraan deegaanta raacaan, dildilaan ku goosmaan wax daryeela waayaan, daaha hiimammowgaa maqal daaqda lagu tebo, cawa-daran la raad guro dibjirtaye ma been baa? Shilna wayna daan-weyn, demmanaanta kama foga xoolaha dayacantaa, inuu daayo mooyee kama durugsanaan karo, doon-doonisteediyo day-dayashadeeduna, darayada libaaxiyo ninka damalka ka hadhsaday, deleb waw gudboon tahay. Haddaan waayey doobkii, xilka doonnantiisaa dayrada u noqon laa, danyar habaqlaheedii duddo bahalku kala tago, miyaan waayey deelkiyo daba socodka qaylada ? Hayin sida dadweynaha, dalaggiyo dhaqaalaha duuggiyo wixii nool, haddii layska dabo galo hadduu aar dalaafiyo, arko belo ku soo diran nafta dawdab roorkaa, daran doorri orodkiyo durdurrada ka buuxsado, maatada derderan iyo Deli iyo jar kala dhaco, dooggaan la maarayn dibna looga soo kaban, didmadiisu keentee haddaan waayey dabarkii, dhacdo lagu daweeyoo lagu dagagaraa jirin, miyaan waayey doohdiyo doobirtii la oran jirey? Danta guud mudnaanteed, gobonnimo daryeelkeed damaciyo hankaygii, haddaan waayey dawgaan is lahaa ha lagu dego, berri degel ma dhaafaan dadka wada jirkiisiyo, isku duubnidiisii lagu doorshey reer-reer, kala daadsan laga dhigay Mus duleedku xanan yahay, qarannimadu dagan tahay gudahana Dab kaga kacay, dawankiyo carooggiyo miyaan waayey Daalacan, sengehayga Doolaal ama faras dirkiisaa, Dayax-weerar oo kale? Ragga daawadii furay, ama daacaddii jaray ama qaranka duudsiyey, Hantidii dadweynaha Dacallada ka buuxsadey, dalku eed ku leeyahay Rag la deydeyaayoo, dedan oo qarsoonoo damacooda xeel iyo, ku darsaday tab hoosoo wixii deyn ku soo baxa, berri diidi karayoo dufankiyo karriinkii, iska duugey maahee dida buurta Daalood, Dal fog bay ka muuqdaan. Diricaasi waa kuma? Dawdar weeye shalay jirey, durba sawkan jeedladay dhistay aqallo daah weyn, tolow duubka yaw xidhay hadmuu tobanka doonyood, dekedaha ku soo xiray hadmuu dunida gaarkeed, intuu daawashaw tegey Demesh iy wixii yiil, sida daad u soo rogey? Kaftankaas dareenka leh, danyartaa ku heestee dadka maanigaa baray, derejada hummaaggaa magacyada dul-saarkaa, darraad soo gadaal baxay maxaa laygu digayaa? Doodda aan ku soo xidho, bi'i waaye deylooy adna darayga hays dhigin, xaajadu dalluun iyo dalow bay ka lulataa, ha ka tuurin daaddeys anna hay dardaar werin Deelleyna aan faro, duco iyo sidii roon dawgaagu waa sahan, dadku waa abbaartaa isku-dira bahdeediyo, kala-dila ha noqonnine isku dara ha lagu dhaho Nin xumaa daneeyoo, waxa jira damqanayee yaanu xagal ka daac iyo, goldaloolo kaa helin xidho duubka nabadeed, daacaddiyo runtaba sheeg daaraanta magacaw Cadowgaagu duurkiyo, hadduu doogga cawskiyo dareemada ka badan yahay, adiguna dab baad tahay Digo shidan hadduu yahay, adna daad socdaad tahay damal adag hadduu yahay, ddna danab dhacaad tahay Baaruudda duushiyo, Dubbe culus hadduu yahay Derbi soo ceshaad tahay Mugdi lagu dayoobiyo, gudcur dama hadduu yahay qorrax duluca furatiyo, dayax buuxsamaad tahay Hadduu aw dillaaliyo, qalin duurre faalshiyo yahay fiqi dammiinana, cilmi durugsan baad tahay Dulin dhiigga miirtiyo, dulmi hilan hadduu yahay xaq dillaacay baad tahay Nin qabiil daftiisiyo, sita daramalkiisoo ku dan qaba hadduu yahay, qaran dawladaad tahay haddey daana daaniyo, Dawliil ku heesaan waxyi soo degaad tahay Inta dunidu raarkiyo, deyrka hoose leedahay qof dulmani ku nool yahay, ilays daaran baad tahay wed jiraana kuma dilo Anigana bir danantiyo, dabran iyo melmelan iyo deldelaad ha lay suro , duuggaygu waa adi. ---------------------------------------------- doolaal, dalandool, shaalle, dedda kaca, carcaraheed, dinaahyaha deebaaq, maansho, duun, dalawadiisii, dayrcad, dafaclaha gosheediyo, dannaaniyin, derrimmo, danbaabirin, dangalo, caal, danadiyo dibbow, dilladii, dellegan, dulbaax, laaciyo milicsiga ku deexdee, dabayoodka luunka leh, dir& duluc, dardaarweri, dunji, daanshood, dibso, sheel, dawdilan, Dardaar, dabra-weerar, deeddan, Deni, daw-dhaaf, daalaadhac, dayradhaaf, aqal laba deryaalaa, darayada, deleb waw gudboon tahay , duddo, dalaaf, dawdab, deli, dagagar, doobir, demesh, dalluun, dalow, anna hay dardaar werin, dadku waa abbaartaa, gol daloollo, daaraanta, daramal, daanadaane, dawliil, dabran & melmelan, |
|
|