|
Barabaalle Iyadoon bar tiro jirin, wax la yiri Lixlaha biig Haddii Baashe lagu dilo, Marka qaybta laga baxo Boolaynta laga dhigo, Shaxda booli tuugiyo Sharci boob ah lagu wado, Afar turub nin barashada ka bogtaa ku gacan gala, Baandheeyaa weligii wax ku beela qaabkaas, waxa adag kan bowsadey isagaana badin kara, Shaashowdey bilicdii Ban martoo la garan waa, Barxantoo la maydhaan Waxa lagu balllaysimay, indho buuryo-goyseed. Buurrantu muuniyo, Barkhad kaydsan maahee Barar taws ah weeyaan, Bugtadiyo xanuunkuna Haddaan baaray waa Ciil, Bahalow shabeelow Hooy bara baraalow, waaryaa nin buureed Bulsho waxay ku leedahay, Beri waxan ogsoonaa adigoon ka soo bixin, Casha Boholaheedoo Dhirta baaxad-weyntaa, Baarkeeda seexdee maqlay inad bannaann iyo, Timid baraha hawdkoo Bulbullow libaaxii, Boqortooyadiisii Duhur ugu bareertoo, Burjigii ka furatoo Bili qaadi weydee, Beelahan agtaadaan kaa soo bariidshoo, Budulkay la soo galay Barkintaad ku jiiftee, waxba baadi xoolaad Beryahaas ma kulanteen? Bahalow Shabeellow, Hoy bara baraalow waaryaa nin buureed, Bulsho waxay ku leedahay Beri waxan ogsoonaa, Adigoo baruurtiyo Cunin bulad ammaankoo, Riyahaaga baadhee Bishan iyo bisheedii, Boqol iyo lag baa maqan Wanankii Bah Ceeblee, Bari iyo Leg goormaa Boholyowgu kuu galay?, Balse waxa la yaab dhalay Nin barwaaqo haystoo, ka engegan baraaree Bishmahaagu Caarrow, Maxay kuu basaaseen ma buskaad is-marisaa? Bahalow Shabeellow, Hoy bara baraalow waaryaa nin buureed, Bulsho waxay ku leedahay Dadka baylahdiisiyo, Baloolleyda tebiskaa Koromada berdaha le'eg, iyo dibida beyga leh Barbarriiji weligaa, Tarab tarab u boqol goo isku biirso laqanyada, isku baano yeelkaa Balse waxa la yaab dhalay, Barta aad ku qalatiyo Baradaaada caydhaa, Raqi kama cidhaantee Ma laftaad burbursaa. Bahalow Shabeellow, Hoy bara baraalow waaryaa nin buureed, Bulsho waxay ku leedahay Badda iyo nafleydii, Balliyada ku noolayd Bogan waaye jiifkoo, Wadnahaa babbanayoo Beerkaa legdamayee, Xaggay bayr ka yeesheen Biyahana ma joogtaa? Bahalow Shabeellow, Hoy bara baraalow waaryaa nin buureed, Bulsho waxay ku leedahay maxaa haadda buubtiyo, Baqayaha daruuraha Balwadiis u noqoteen, wax la baratamaa jirin ama booddo lagu qaban, Baqdintaada awgeed Bogga uga qarqarayaan, Miyaad baalal leedahay? Bahalow Shabeellow, Hoy bara baraalow waaryaa nin buureed, Bulsho waxay ku leedahay Bari iyo Galbeedow, Haddaad baahdey aashaa Qalwo bogox ku leedahay, Bidixdana ku furan tahay Midigntana barkaa yaal, Nin boqool ku tala galay Dhankee kaaga bayraa?, Dhinaceed u badan tahay? Barbarkee ka maqan tahay?, Bismillaahi yaahuu- Degelyohow barkuma-taal, Bulsho waxay ku leedahay Bisiq iyo xangey iyo, Banji iyo dharkayn iyo Bilcilkaaga hawliyo, Dhirta boocda mooyee Tolow baad la daaqiyo, Miyaan cawsna kaa bixin? Degelyoho barkuma-taal, Bulsho waxay ku leedahay Beertaadu hoog iyo, Bacad iyo Habaas iyo Bacow iyo qaniin iyo, Badso iyo shirqool iyo Burso iyo khiyaaniyo, Beeraadka samihiyo u buseelka godobtiyio, Boqon goynta nabaddiyo Booraanta jarankiyo, Boholaha asaydiyo Cabsi iyo ma been baa?, Biyaheedu dhiig iyo Xinjir bururinteediyo, ma baroorta dumarkaa? Balka iyo sabuulkuna, Ma banbaane ololiyo Waran iyo billaawiyo, Baaruudda huguntiyo Birta lagu idlaadaa? Baaq baaqu Daab iyo, Bishil iyo ma soofaa? waxa lagu bislaystiyo, Badarkeedu dhimashiyo Baga iyo ku digashiyo, ma Busaarad dhegalaa? Bahalow Shabeellow, Hoy bara baraalow waaryaa nin buureed, Bulsho waxay ku leedahay Beryahaagan ka horow, Bahda habar-dugaag yahay marka ay biciidkiyo, Koran buuran loogtaan inta boorku qariyaa, waxba yay barkoodiyo Helin bawdo hilib lee, kolay biixi ruugaan Marka biiri qaatiyo, Qawluhu is boobaan mid afkii ka buux samay, wax ka bililiqaystaan badanaa ma qadi jirin, raqda baallaheediyo badka kama maqnaan jirin, saw tan Buulalleydii ku bakhtiday ag-taadii. Burrusow Dameerow, Biyo ceel ma keenow hadba dhaan ku biirow, Beelaha aroorkaa iska daba boqoolow, Bulsho waxay ku leedahay Geela baadi soocdiyo, Sumaddiyo birqaabka leh Boodaanta wada xiran, meeyey baarqabkiisii Baqal looma tu'iyee, yaa baacso kugu yiri? |
|
|