|
B A A Q Abwaanku wuxuu noogu baaqayaa in aan jeclaanno wixii Alle na siiyey ee dhulkeenna iyo dadkeennaba ah: Adigoon cirka u bixin, ama boodin leexada ama badaha waaweyn, nafta aan ku biimayn Baariis adoon tegin, ama Boon ka sheekayn barashada dalkaagaa, horta laga bogtaayoo beryo laysku hawlaa Dhulku baaxad sooriyo, Banan miiran weeyaan ama waa Bus iyo oon, ninka Buug ku haystow beentaada weeyaan ! Balcad Jawhar Shalanbood, barakada Qoryooley waxa Canab bislaadee, Baydhabi u gaar tahay Boosaaso iyo Beer, Bixin-duule Laaleys Biyo guure Kalabaydh, Beeraha Wajaalee lagu reebay Baahida, Baardheere iyo Jilib waa Boqol kunoo Mayl, dhulka lagu baraaree Beeyadu ku taallee, Badar lagu abuuree lagu riday Bariiskee, Balka lagu tallaalee muuskiyo Babbaygii, barkadeen Xareeddoo waxa taa ka sii badan, dhulka Bari-samaadkee Beeshaanu daaqdee, Barta aynu dhaqannaa Barqo dhereg ka joogtee, iyadoo Barwaaqaa Balliyada Xareeddii, ku bariisanaysoo Bidix Midig dhan loo dayo, Barigiyo Galbeedkaba Waaberi Cadceedii, soo saartay baallaha Bilcilkiyo Maraagii, Shinbiruhu bulxamayaan indhihii basaasow, Boorame ma aragteen? Ma ogtahay Barbaareey, heesaha Barawn tumo adigoon bogga u lulin, Beerrey Kaweewey Bismillaahi Saylici, Hanna-haybsantii bari Batar iyo wareegtaa, kuu baadi soocee. Ma ogtahay Barbaareey, qalabkana Bud dhumucliyo Waran iyo Billaawaa, kuu baadi soocee Ma ogtahay Barbaareey, Barshin iyo Darfooley Bayluuli xararlaa, kuu baadi soocee Ma ogtahay Barbaareey, waxa loo buseelaa ama qurux ku caan baxay, ama laysku baantaa ama lagu bogsoodaa, Kal-bugtaa ku faydaa kugu deeqa Baashaal, Guri bila ku magac dheer Hablaheenna Bilicdiyo, Biliggiyo il-waadka leh Bilcantii shisheeyaha, ninka beegsanaayow waxaan kaaga baqayaa, inaad baadi noqotee cidla baylah keligaa, yaanu bahalku kaa helin Isu buri geyaankaa, barta gogoshu kuu taal Bahda lagama maarmaan, bud-dhiggaaga koowaad Baaqaygu waa kaas. |
|
|